Variante Espiritual do Camiño de Santiago
Inicio:
Fragamoreira (San Xoán de Poio)
Distancia:
10 quilómetros aproximadamente (polo municipio de Poio).
Dificultade:
Baixa.
Polo municipio de Poio pasa a denominada Variante Espiritual do Camiño de Santiago. Trátase dun itinerario que une dous roteiros xacobeos: o Camiño Portugués e o Camiño do Mar, atravesando as terras do Salnés e A Arousa. Divídese en tres etapas que suman un percorrido total de 73 quilómetros partindo da cidade de Pontevedra na Praza da Peregrina. A última etapa é a tamén denominada da Traslatio, porque reproduce o percorrido por mar dos restos do apóstolo Santiago ata Padrón.
O paso do Camiño por Poio comeza polo lugar de Fragamoreira (San Xoán de Poio). Nos seus primeiros quilómetros o trazado coincide co Roteiro do Padre Sarmiento. A primeira parada importante é o Mosteiro de San Xoán de Poio e desde aquí continúase ata a enseada da Reiboa-A Seca, onde podemos visitar o Parque da Memoria. O traxecto segue pola costa ata o núcleo histórico de Combarro, onde se separa do Roteiro do Padre Sarmiento para tomar dirección norte cara ao mosteiro de Armenteira en terras do municipio de Meis.
Esta ruta pertence á rede de Senderos Azules creada pola Asociación de Educación Ambiental e do Consumidor ADEAC
Roteiro do Padre Sarmiento
Inicio:
Mosteiro de San Xoán de Poio (San Xoán de Poio).
Distancia:
12 quilómetros aproximadamente (polo municipio de Poio).
Dificultade:
Baixa.
Este roteiro reproduce o camiño que realizou en 1745 o monxe ilustrado frei Martín Sarmiento na súa peregrinación a Compostela e que documentou na súa obra «Viaxe a Galicia». O percorrido total de 190 quilómetros atravesa os municipios de Pontevedra, Poio, Sanxenxo, O Grove, Meaño, Cambados, Vilanova de Arousa, A Illa de Arousa e Vilagarcía, Catoira e Pontecesures
Polo municipio de Poio o itinerario atravesa aproximadamente 12 quilómetros da primeira etapa (Pontevedra-Sanxenxo). Desde Pontevedra chégase polo lugar de Fragamoreira e o primeiro gran punto de interese é o Monasterio de San Xoán de Poio. Desde aquí o camiño continúa en dirección á costa ata a enseada de Reiboa-A Seca, pasando polo Parque da Memoria. A partir deste punto o traxecto é completamente litoral e chega ata o núcleo histórico de Combarro para seguir en dirección oeste polas praias de Chancelas, Ouriceira, Area da Barca, Covelo, Laño e Raxó. A partir do núcleo de Raxó (San Gregorio de Raxó) o camiño continúa polo municipio de Sanxenxo.
Roteiro dos muíños de Samieira
Inicio:
Praza de Alfredo Romay Besada (San Xoán de Poio).
Distancia:
5,5 quilómetros (ida e volta).
Dificultade:
Baixa.
Este itinerario percorre un total de 23 muíños ao longo do curso do río Freiría, tamén chamado Rego dos Muíños ou Rego dos Frades. Segundo a tradición este nome débese a que, no nacemento do río, no lugar do Busto, un nobre convertido a frade edificou un mosteiro do que non quedan restos.
A senda parte da Praza de Alfredo Romay, desde o denominado Muíño de Cubo de Abaixo e transcorre río arriba sempre pegada á beira atravesando bosques de ribeira con freixos, bidueiros, abeleiras, salgueiros e carballos. Todo o percorrido está acondicionado para o paseo por un camiño de terra con numerosas pasarelas de madeira para evitar desniveis e vadear a corrente. Existen ademais zonas acondicionadas para o descanso con mesas e bancos.
Esta ruta pertence á rede de Senderos Azules creada pola Asociación de Educación Ambiental e do Consumidor ADEAC
Roteiro da Freixa
Inicio:
Área Deportiva da Seca (San Xoán de Poio).
Distancia:
1,8 quilómetros (ida e volta).
Dificultade:
Baixa.
O itinerario comeza e finaliza na desembocadura do regueiro da Cancela, coincidindo coa área deportiva da Seca e o Parque da Memoria, deseñado polo premio Nobel Adolfo Pérez Esquivel. O percorrido transcorre río arriba e, nun tramo de menos dun quilómetro, pásase por nove muíños dos cales sete se atopan restaurados. O coñecido como Muíño de Arriba foi ademais integramente rehabilitado con toda a maquinaria para o seu funcionamento. Ademais dos muíños son de enorme interese os pasos (pontellas) para cruzar o río, os tramos empedrados do camiño, ou as canles que conducían auga aos rodicios, como o do Muíño da Bufa de 40 metros de lonxitude.
O camiño desenvólvese por unha zona de alto valor ecolóxico, entre amieiros, salgueiros, bidueiros e carballos. Unha boa oportunidade para observar fauna variada, desde aves como lavandeiras reais, réptiles como o lagarto verdinegro ou anfibios como píntegas e ras ibéricas.
Fervenzas do Pereiro
Inicio:
Pereiro de Abaixo (San Xoán de Poio).
Distancia:
1,5 quilómetros (ida e volta).
Dificultad:
Baixa.
Este roteiro transcorre polas ribeiras do regueiro do Pereiro, unha corrente fluvial nacida de varias fontes que conflúen na Cachada da Randa e desemboca na enseada da Reiboa-A Seca, xusto á beira do Parque de la Memoria.
O percorrido iníciase na Ponte Vella, na zona superior do lugar, e sobe polo carreiro atravesando un característico bosque de ribeira ao longo do cal pasamos por varias pontes de madeira e ata tres muíños abandonados. Un dos principais atractivos do roteiro son as fervenzas. A primeira, chamada A Pindilleira. localízase a 475 metros do inicio e ten case 7 metros de altura. A fervenza da Freixa Alta sitúase xusto ao final do carreiro e ten unha altura de 10 metros. A dificultade do roteiro é baixa, pero débese ter en conta que conta con maiores desniveis que outros itinerarios de Poio.
Senda da Ostreira- Sendeiro litoral de Poio
Inicio:
Peirao de Campelo (San Xoán de Poio).
Distancia:
1,8 quilómetros.
Dificultade:
Baixa.
O nome deste percorrido débese a que transcorre por unha área litoral que outrora era das de maior produción de ostra na ría. De feito, neste lugar edificouse en 1868 o primeiro parque de ostricultura da península Ibérica. Con todo, co paso do tempo a sobreexplotación do recurso fixo desaparecer a actividade, aínda que deixou pegada na toponimia.
A senda ten unha lonxitude de 1,8 quilómetros, é de ida e volta e presenta unha dificultade baixa. Pódese iniciar no peirao de Campelo en San Xoán de Poio. O camiño transcorre pola costa con fermosas vistas da ría de Pontevedra, a Illa de Tambo e o Illote dos Ratos, ata Área Recreativa da Seca. Desde esta zona pódese continuar o paseo polo Roteiro dos muíños da Freixa.
Esta ruta está galardoada coa distinción de “Sendero Azul 2025” outorgada pola Asociación de Educación Ambiental e do Consumidor ADEAC
A Senda do Laño
Inicio:
Peirao de Covelo (Covelo-Samieira).
Distancia:
1,2 quilómetros
Dificultade:
Baixa.
Esta senda percorre parte da costa de Samieira, pasando por pequenas calas e zonas de carballeira. O percorrido é de baixa dificultade e posúe unha lonxitude total de 1,2 quilómetros. O camiño comeza no peirao de Covelo e discorre pola costa da parroquia de Santa María de Samieira, pasando polas praias de Covelo, O Caeiro e Laño. Ao final do roteiro pódense contemplar as fermosas vistas da ría de Pontevedra desde o miradoiro de Laño. Moi preto atópase un dos roteiros de sendeirismo máis bonitos da localidade, o Roteiro dos Muiños de Samiera.
